Nobas de Guiné: Tio Zé da Silva ku Tio Djon Faty na Rádio

Mussá Baldé, Jornalista

“Tio Djon Faty de Farim kuma purmeru na scola de Farim padri Henriqui tene nan palmatoria pa palmatoria mininu ku ta pui mangasson na scola. Kuma brincadeira ka tem na scola kil tempu. (…)Tio Zé da Silva kuma ke ku mas ta admiral gossi na Guiné i falta di ordi na region. Kuma stadu ta manda manga di djintis pa regions… ma ninguin ka ta sedu kapaz di pui ordi na region”.

Radio Nacional tene manga di programas nobus, desdi ku nha ermon garandi Muniro Conté bai pa la suma diretor, alias, i numiam si considjadur técnico principal.

Nô Kriol: Krónicas di Mussá Baldé

Nô Kriol: Krónicas di Mussá Baldé

Ahos na programa Bumbam Garandi i sta ba la dus homis garandis: Tio Djon Faty de Farim ku tio Zé da Silva de Bissau. Tema di debate i era: Educacon di kil tempo. Kombessa gustus i passa.

Homis garandis kuma Guiné torkia gossi toroki i ka parsi dja mas ki mesmo terra. Kuma purmeru rapacis ta tarbadja é ka ta ossa ba purfia sé garandis. Kuma rapacis di goss son sinta na bankadas pa discuti kussas di utrus terras. Kuma kaba é ta somna tok é kaba é pega guerria.

Kuma badjudas ka misti tarbadju son bim paciaa na Bissau. Kuma purmeru su manda mininu u ta cuspi na tchon u falal bai gossi bu riba antis dés cuspinhu na seku si seku u ka bim son bu mamé na murri. Kuma mininu ta kurri fass fass i riba. Ma gossi son pidi tio patin cem fran.

Tio Djon Faty de Farim kuma purmeru na scola de Farim padri Henriqui tene nan palmatoria pa palmatoria mininu ku ta pui mangasson na scola. Kuma brincadeira ka tem na scola kil tempu. Kuma gossi mininus son rafila ku pursor. Kuma purmeru mininu ta sutadu nada kata sai.

Tio Zé da Silva kuma ke ku mas ta admiral gossi na Guiné i falta di ordi na region. Kuma stadu ta manda manga di djintis pa regions, governador, administrador, delegado, djuiz, magistrado, sindicato, responsável, manga di djintis ma ninguin ka ta sedu kapaz di pui ordi na region. Kuma purmeru quatro djintis son ku ta manda na region: administradur, chefe di postu, ku dus sipaios. Kuma kilis ta sibi tudu kussa na regiona té na tabanka. Su tene dus mindjeris, 20 bacas, 30 cabras, 50 galinha, é ta sibil fep. Nada kata kapli elis. Dia ku Administrador na bai bu tabanka tudu djintis ta sta na reuinon. Si um alguin falta son sipaio ta punta del. I era ordi. Ma kuma goss ninguin i ka kapaz di sibi kantu djintis ku ta sta na um kassa ku fadi na um tabanka. Kuma Guiné muda.

Tio Djon Faty kuma el i sta sempre na Farim ma i ta bim ba Bissau. Kuma kau i era limpu. Di matadur té na Polas. Kuma ai di bo si policia panhau ba u na xixi na rua. Kada beku tene um policia sikidu i na bicia discarnossis. Kuma um bias i odja un nudadi na bandé. Um homi firma i na missa na rua pertu di bumba di gasolina policia panhal. É dispil nan si calssa é pul pa i limpa kil si missa ku si calssa. Kuma ordi tem ba.

Programa tene manga di sukutaduris. Djintis ta liga é na ngaba.

Nha ermon garandi Muniro Conté sta na fassi um bom tarbadju na RDN. I kana tarda emissons na sta na internet. Novidadis na bim i kana tarda.

Mantenhas de Terra.

Mussá Baldé

 

2 Responses to Nobas de Guiné: Tio Zé da Silva ku Tio Djon Faty na Rádio

  1. Mário Incada diz:

    Djubi, nha ermon tok sangui yandan na kurpu ehs propi ku yeraba Bissau odjanu mininus, ma gosy nada kasta diritu

  2. joao baptista mendes diz:

    coisas do género servem fundamenlmente para reactivar a moral que a nossa sociedade tem perdido ao longo de varios anos. Mas para que este programa possa ter efeito esperado, é necessário que a RDN normalize a sua capacidade de funcionamento para poder atingir ate ao último cidadão e porque nao além fronteira.

    forças,forças

Deixe uma resposta

O seu endereço de email não será publicado. Campos obrigatórios marcados com *

Este site utiliza o Akismet para reduzir spam. Fica a saber como são processados os dados dos comentários.