Nô Kriol: Ntindimentu na Bandé, Runion na Bandé — Krónicas di Mussá Baldé

Mussá Baldé, Jornalista

Kil dia kada kin lanta i biska si bom ropa i fala si mindjer ami nsunha kuma djintis di no terra ka kontenti ku nha tarbadju na bantaba garandi. Kada kin, na si burdu, pui mon na sintidu i na biska ntindi si sunhu. Kada kin na si bokana seta kuma raiba tem ku maina, kombessa tem ku sintadu pa lokoti kumpanher na fundu du korson nerbus. Son pa tchoma kombessa garandi na terra.

Por Mussá Baldé, Jornalista

Bus botadu, listikara djubibu, polons puntadu, galinha kortadu. Kada kin konta dissiu. Kuma i na bim fiu si djintis di diante di terra ka papia. Elis tudu é kontadu keku cabaz di sorti fala. Mbom aladja parci é kunsa panta. Kuma di fassi  son pa mansa korson. É manda nghutru rekadu kuma pa é bai kontra na kampu di bola pa laba kabessa. Pa kada kin leba si rosson ku si mbuludju di pidi desculpa a si mandjua di dianteira. Utrus garandis di terra tchomadu pa ba mati kil santamaria di kombessa. Bandé na firbi suma kaleron di kassa garandi. Kada kin bim na si karru i tchiga i ria i sikidu bas di po. Purmeru i tchiga Presidente Jomav de Kalequisse, dispus i bim nhu Ndjeneher di Farim (Purmeru Ministru Domingos) dispus i bim nhu Cipriano Cassama di Binar.

Nô Kriol: Krónicas di Mussá Baldé

Nô Kriol: Krónicas di Mussá Baldé

Kada kin sikidu na si burdu i na djubi pa ladu di mar di bandé. Nin mantenha é ka fala nghutru. Mbokadinhu son suma nan alguin fala elis é dati son é vira é pega ngaba nó mar. Ma Guiné tené mar bonitu bó. Presidente Jomav, suma chefi garandi, i fala elis….. é, nin no ka sinta. Cipriano Cassama fala djanan i bardadi no sinta pon. Purmeru Ministru, suma mas nobu entri elis, i bai biska banku i tici parelis tudu. Garandis di terra ku kumbidadu é sikidu son é na djubi elis. No dixa elis é na ntindi kuma um tchon son ké massa. No kala son é na sibi kuma aonti passa dja, ahos ku no sta nel ma amanha na bim nan. Cipriano, homi di sangui kinti, toma kombessa.

Cipriano Cassama: Ma ké propi  ku no tem?

Presidente Jomav: Mpunta bos tambi pabia ami mé nka sibi.

Purmeru Ministru: Ami mé ke son kun mpudi fala bos i pa no purda nghutru. No ranka terra.

Cipriano Cassama: I Bardadi. Ou Zeca i kuma?

Presidente Jomav: Suma ami ki chefi garandi mpensa tan kuma no dibidi purda nghutru pabia si kada kin tici si rosson li no kana sai li

Purmeru Ministru: Kaba terra kana ranka.

Cipriano Cassama: No dibidi di purda nghutru pabia anós i di memu partido garandi, kaba mas anós tudu i di norte: Kalequisse, Binar ku Farim.

Presidente Jomav: I sta bom. Ma na pidi nha ermonsinhu di Farim pa i fassim um fabur.

Purmeru Ministru: Sim. Nha mano. És i kal fabur?

Presidente Jomav: Tiran na Governu djintis ku djustiça na bisca.

Purmeru Ministru: I sta bom mano, na tira elis fep um son um son, ma mpudi tan pidiu um kussa?

Presidente Jomav: Claro, claro, abo i nha ermonsinhu. Pidi.

Cipriano Cassama: I na sibidu.

Purmeru Ministru: Fala bu djintis, bu considjaduris, pa é dixan ntarbadja, pa é para tchutchinu. Anós i ermon. Pa é para!

Presidente Jomav: I sta bom. Nha ermon di Binar, Cipriano, pará fassi suma abo ki Presidente. Pará bai pidi desculpa la fora sin no ka filanta.

Cipriano Cassama: I sta bom. Na para. Ma Zeca pabia ku manda tiran mota di scolta?

Homis garandis ku na mati ba odja kuma mindjor é bai raparti é djintis antis di é pega nhgutru ku mon.

Mbom anós no sikidu no na djubi bos ma no pensa kuma i mindjor bo para li. Paki si ka sin i na bim fiu.

Kada kin dá si kumpanher mon i barsa si kumpanher i mbarka na si karru i bai pa si kassa.

Um mindjer garandi ku sta ba la i rabida i fala sim:

Bu odja kombessa i ka faka ma i ta fidi. Esis kadakin sibi dja ké ku utru ka gosta. Mpensa di li pa diante é na torkia manera.

 

Mantenhas

Mussa Baldé

 

 

 

 

7 Responses to Nô Kriol: Ntindimentu na Bandé, Runion na Bandé — Krónicas di Mussá Baldé

  1. julio melo diz:

    Grande tarbadjo nha hermon de mi nta admira bu tarbadjo força coragem bu continua es ku Guiné precisa ika kilis ku ta fala é misti Guiné son pa se bolso

  2. Ibraima Sall, di Babok diz:

    Mais novo, finalmente apareceu alguem com coragem para por o dedo na ferida. E exactamente o que falta, o diálogo. Si cada kin sibi keku kil utur ca misti i ta facil pa e ” ndianta”, suma cu nha garandi Saturnino ta fala. Pa Deus abençoa.GB na es mês sagrado di Ndjundjun!

  3. Augusto diz:

    Ku bom kombersa tudo ta kumpu. Ika bali pena pa no bata djusia. I fado kuma:
    _NA KASSA NUNDE KU FOMI TEM, TUDO GUINTIS TA DJUSSIA, MA NIGUIN KATA TEM ROSSON.

  4. Bubacar Djalo diz:

    Grande talento do meu mais novo.Tudo indica que sera assim.

  5. Anonymus diz:

    Amén!
    Mussa Baldé, fia di kuma kil ku korson seta, sintidu pega i ta sedu. Gosi i falta pa anós tudu no finka nó djudjus na tchon, pa pidi Deus pa I pui elis pa é sinta, é kombersa i pa tudu pasa suma nhu skirbi.
    Ami nfia dja kuma tudu na pasa, pabia Deus na obi nó miskinhus na orason.

  6. alexandre diz:

    Es i um cronica de seculo,,,,grande tarbadju amigo Mussa balde,,,forca.

  7. Djaló Mamudo diz:

    Mano bardade nfia abó i nam i kriol m’miste aprende ku bó tchiu..

Deixe uma resposta

O seu endereço de email não será publicado. Campos obrigatórios marcados com *

Este site utiliza o Akismet para reduzir spam. Fica a saber como são processados os dados dos comentários.